A fêa de sant’Agâ - Giuseppe Marzari

per sentirla clicca qui
2,11 min.

A fêa de sant’Agâ
Pe 'na vêgia tradiçion
quand'arîva Sant'Agâ
o l'é tutto un baracon
longo a stradda e in sciô ciasâ
Ricordæ, cangiando câza,
quante röba ch'éi caciòu
amugiâ ôa a l'intâza
tutti i banchi do mercòu.

Tende vêge repesæ
e cornixi scamoræ,
de casòule aruzenîe
rataieu, candê, böxîe,
un intero asortimento
de vestîi do seteçénto,
scarpe vêge, uose, ghette,
di scösæ, de picagette,
maxinin, færi da stiâ,
di baloìn ancon da insciâ,
unn-a stuffa a gas metâno,
papagalli de Morâno,
porpezoéi, canne, salâi,
poltroncinn-e, lanpadâi,
cöse antîghe, cöse stranbe,
scanbeletti con træ ganbe,
borse in pelle, portafeuggi,
de gratænn-e sensa béuggi,
ma stæ atenti a-a vòstra pelle,
merce in tæra, prêxi a-e stelle,
conche, vâzi, pëteninn-e,
pagliericci, letti e chinn-e,
lùmmi asmòrti, paralùmmi,
di flacoin sensa profùmmi,
baterîe, còrni, tronboin,
portavazi e ghirindoin,
stilli, sciàbbre, baionette,
vêgi sccéuppi co-e canette,
vîe, stachette, daddi e ciöi,
un capello da coi-bôi,
quarche bròcca, pæte, tondi,
'na perucca de péi biondi,
di baçî, di fiôri finti,
banse, quaddri, laori, cinti,
quarche òxello fêua da gàggia,
o se dónque pin de pàggia,
tutto questo poéi trovâ
in sciâ fêa de Sant'Agâ,
anæ a vedde quande voéi,
de domenega o d’êuvéi,
no stæ a dî: «Mi no n'acatto»,
a-i dinæ no stæ atachæ,
e ciù vòtte anche un ravatto
o peu avéi 'n'utilitæ.

Inte questo canpionâio
peu anche dâse ch'atrovæ
un ricòrdo do mesiâo
o, magâri, de seu poæ.
Tra i raduni d'arte e scense
e i congressi a lieto fin
fra concerti e conferense
viva a fêa di repesin!

La fiera di Sant'Agata
Per una vecchia tradizione
quando arriva Sant'Agata
è tutto un baraccone
lungo la strada e sul piazzale
Ricordate, cambiando casa,
quanta roba che avete buttato
amucchiata ora intasa
tutti i banchi del mercato.

Tende vecchie rattoppate
e cornici scheggiate,
delle casseruole arruginite
trappole per topi, candelieri, bugie,
un intero assortimento
di vestiti del settecento,
scarpe vecchie, uose, ghette,
dei grembiuli, dei strofinacci,
macinini, ferri da stiro,
dei palloni ancora da gonfiare,
una stufa a gas metano,
papagalli di Murano,
ami per polpi, canne, salai,
poltroncine, lampadari,
cose antiche, cose strambe,
sgabelli con tre gambe,
borse in pelle, portafogli,
delle grattugie senza buchi,
ma state attenti alla vostra pelle,
merce in terra, prezzi alle stelle,
conche, vasi, pettini lunghi,
pagliericci, letti e culle,
lumi spenti, paralumi,
dei flaconi senza profumi,
batterie, corni, tromboni,
portavasi e comodini,
stiletti, sciabole, baionette,
vecchi fucili con le cannette,
viti, chiodini, dadi e chiodi,
un capello da cow-boy,
qualche brocca, palette, piatti,
una parrucca di peli biondi,
dei catini, dei fiori finti,
bilance, quadri, lauri, cinti,
qualche uccello fuori della gabbia,
o altrimenti pieni di paglia,
tutto questo potete trovare
sulla fiera di Sant'Agata,
andate a vedere quando volete,
di domenica o giorno feriale,
non state a dire: «Io non ne compro»,
ai soldi non state attaccati,
le più volte anche un cianfrusaglia
può avere un'utilità.

In questo campionario
può anche darsi che trovate
un ricordo del nonno
o, magari, di suo papà.
Tra i raduni d'arte e scienze
e i congressi a lieto fine
fra concerti e conferenze
viva la fiera dei rigattieri!

quello in corsivo non è genovese.